紅灣半島加西九龍，經已取代咗○七○八雙普選及公投問題，變咗民怨雙響炮！
冇得攬實阿爺大髀喊叫
老懵董遇着新問題。雙普選同公投，尚且有得攬實中央阿爺條大髀大喊大叫，紅灣半島西九龍，同政制民主無關，唔通又叫胡溫中央出手擺平？咁重有冇一國兩制？不如叫曾慶紅落嚟做特首、廖暉落嚟做政務司司長好過喇係咪？
紅灣半島變咗折墮騷，唔怪得長毛義憤填膺，高呼拆一層樓，向納稅人賠番五億！一個地產項目，變咗遊戲積木，咁益地產商，一鑊未夠再整多鑊，鬍鬚孫罪魁禍首，用八億公帑，賤賣大包，喺第二個國家，未使國會譴責，一早就知恥落台！
獨係呢個政府，敗港八年，早已唔知個恥字點寫咯。紅灣半島若然拆咗，搞到沙塵滾滾，污染生態！倒不如諗下有乜正面用途。
好多人話，香港唔夠博物館喎。嗱，保留紅灣半島，咪可以改為「特區十年浩劫紅灣博物館」囉！