醜婦終須見家翁，原本上月尾交成績表嘅8號仔，拖到噚日。一如所料，呢排努力學習辦報、要為新聞自由做啲嘢、仲未成為8號仔pasttense嘅李主席二少並冇蒲頭。
向記者解話呢個神聖任務，自然落喺身價不菲兼有大把嘢未做完嘅副主席蘇澤光身上。解乜？梗係二少單世紀賣盤刁，同埋佢份新合約點解會有安家費啦！
先講蘇生嗰條媲美南京條約咁辣嘅安家費條款（內容大致係一旦轉老細，佢可以攞1800萬賠償，兼可以同主子齊齊撇），佢話份新合約2月傾、3月簽，賣資產單嘢係6、7月嘅事，咁當時梗係「完全猜測唔到同預計唔到」，再者2月嗰陣，二少都未諗到要賣盤，所以兩件事完全無關。
咁呢條條款係點彈出嚟？佢老人家話：「只係有個比較能幹嘅律師，幫我諗埋呢點加落去保障吓我。」佢強調：「個律師唔係Richard介紹畀我嘅。」聽到呢度，華華諗到三樣嘢──

加條款獲1800萬安家費

一、蘇生他日唔do8號仔副主席，可以出書講鬼故，或者去電台開咪主持「不可思議的真人真事」，又或者開拍「太古坊X-file」；
二、二少應該即刻做嘢，換晒自己嗰team律師，等他日撞到第二個「姓屈」嘅都唔使咁甘！
三、蘇生可唔可以介紹個律師畀大家（包括李二少）識呢？
咁蘇生到底走唔走呢？佢話自己剛剛進入第二份合約期（7月份生效），佢無意離開8號仔，所以亦唔涉及任何分手費。
至於一向內斂嘅CFOAA艾維朗，亦被問到會唔會鬆人，佢話入咗8號仔八年（計埋之前盈科數碼動力），到𠵱家都仲係第一份合約，而喺呢間咁刺激同埋有挑戰性嘅公司做嘢好開心。唔知仲以為AA喺度選緊香港小姐㖭！
不過，最重要係原來佢都希望搵個好醒嘅律師……估唔到，無咗二少的8號仔管理層，原來都可以咁精采咁有layer，呢個世界真係無話無咗邊個唔得！
李華華
[email protected]