正服兵役嘅韓國天團BIGBANG成員T.O.P，早前爆出去年10月喺寓所跟21歲女練習生韓瑞希吸食大麻，事件令外界相當震驚，而T.O.P遭檢方不拘留起訴，案件定於本月29號開審，T.O.P需要出庭作供。不過韓國今日方面再爆出有演員涉吸食大麻被捕，當中包括曾拍攝《好運羅曼史》、《製作人們》嘅61歲男星奇周峯及曾演出韓劇《怪物》、《Hotel King》嘅65歲話劇演員鄭在真。

據悉奇周峯及鄭在真分別於去年12月中及年底向同一人A某購入並吸食大麻煙，韓國京畿北部地方警察廳嘅品搜查隊經過調查後，以違反毒品類管理法拘捕兩人。及後警方以鄭在真嘅毛髮及奇周峯嘅小便進行檢驗，結果顯示對大麻呈陽性反應，不過兩人否認控罪。

報道指鄭在真於上周五被捕，目前仍被拘留喺警署，奇周峯則預計本周進行盤問，報道又指據A某嘅講法，A某係免費提供大麻煙畀兩人，只要求鄭在真畀其媳婦參演作品，而警方就會繼續調查A某有冇向其他人提供大麻。至於奇周峯所屬事務所表示正了解事件，指與奇周峯通話時，奇周峯表示有冤枉嘅地方，將喺了解事情後發表立場。

另外，韓國女團Brown Eyed Girls的29歲成員佳仁早前喺Instagram爆seed，指曾被其演員男友朱智勛嘅朋友朴正旭引誘食大麻，而首爾地方警察廳嘅毒品調查科已經展開調查。負責人今日表示佳仁於上周二(6號)已經以參考人身份接受調查，至於朴正旭亦已於上周四(8號)以參考人身份被傳召接受調查，暫時未知會否繼續作追加調查。