區選大局已定，各黨派係時候籌謀區議會主席人選。縱使民主派喺今屆區選議席有啲突圍區份，都未能扭轉大部份區議會主席都會由建制派出掌嘅情況，皆因就算泛民喺有啲區如沙田贏咗、可惜計埋當然議員都夠半數。但其實花生友最關心嘅，係葵青區嘅主席一職花落誰家；如果係去返民主黨前成員、改投新思維嘅周奕希手上，到底有冇乜啟示？
其實區選未投票之前，地區消息已經流傳，已經喺葵青荔景選區自動當選嘅周奕希，有望坐正做主席。點解建制派肯送大禮？花生友八過嘞，一嚟因為原葵青區區會主席、經民聯方平，今屆無得做委任議員後，一度擬轉戰直選以便再繼續做葵青話事人。

可惜吖，據聞方平唔係太爭氣，做極唔起，最終為免敗選收場，中聯辦決定收埋方平唔畀佢選，搞到主席人選又要再搵過。蜀中無大將之下，建制派可揀嘅不多，而周奕希其實之前都做過葵青區主席，對議事規則同議會運作都好熟悉。
但當然啦，周奕希最大嘅賣點並唔係往績、而係現時政治立場，皆因佢已經係新思維嘅人，即係黃成智果檔溫和民主派，唔少人睇落，其實已經屬建制自己友，而周奕希甚至已經係肇慶市政協委員，根本同建制派都冇分你我，據聞建制派私下已首肯，由周奕希做返佢哋當區阿頭；泛民就算唔接受，人數較少下都難成氣候。

花生友
周二、四刊出