每年七月又係書展季節，佔中九子之一、社福界議員邵家臻今年趁書展推出新書《我地低端》，將過去喺報章嘅專欄結集成書，表達喺佔領運動之後，以及進入議會嘅感受。家臻話取名《我地低端》有兩個意思，一方面代表佢長期關心弱勢同邊緣社群，另一方面都係因為自己出身基層，同樣係「低端人口」。

唔講大家未必知，今次原來係佢第29次出書，其實上年寫完《廢青救地球》之後，佢已經想收筆唔再寫，決定進入議會之後要專心議事，但最後都係心癢癢，忍唔住手今年又出書，佢形容「文字係有力量」，出書令佢好滿足。佔中案今年底就開審，阿臻話有入獄嘅準備，獄中佢會繼續寫書，有得寫就會盡寫 。