賭王公子何猷君嘅變臉女友白緯玲（Yumi），成日喺ig暗示情變耍花槍，噚晚又出招，話自己暴瘦變成骨頭人，係因為喊得太多，冇胃口食嘢；之後仲plug歌——係post自己首歌《當時的我們》MV截圖，留言：「感謝你的背叛，讓我寫出好歌」。

又哭又背叛，之前一個月猷君先喺fb高調晒同Yumi糖黐豆戴情侶帽，真係睇到大家精神分裂。

Yumi大大聲講「背叛」，據知情人士透露，呢件事，係案中有案。不嬲猷君同Yumi兩地靠電話維繫戀情，之前分手再復合，猷君愛得更沉迷，所以佢喺fb畀名份Yumi都在所不計。

呢咬「案中案」，過程係咁嘅，喺美國讀書嘅猷君，上個禮拜感恩節都飛返嚟，就係約咗Yumi一齊喺香港過節，誰不知，噚日就有周刊圖文並茂、影到Yumi同內地肌男奀星孫祖君，去咗蘭桂坊夜蒲。兩人發現「斷正」後，即call何氏家族名下靚車速閃。

孫祖君接受周刊訪問時，直言：「猷君是誰？」，仲擺明有意思追Yumi，佢話:「我覺得跟Yumi比較聊得來，有甚麼我們都會說。之前她要求我去她的家聽她的專輯。這是她對我的一種信任，我應該是她比較親的人吧。」有指孫祖君同Yumi係喺北京認識，兩人好快就打得火熱。

身在美國嘅猷君睇到報道，得悉當晚Yumi偷食講大話，仲call埋何家架車逃走，梗係都火嚟，噚日即越洋同Yumi開片，雖然女方猛話同孫祖君朋友關係，猷君都覺得佢有所隱瞞，之後忍痛分手。

誰不知，Yumi被撇後即先發制人，喺ig扮晒慘情超蓮咁，自憐暴瘦皆因被背叛，咁邊個背叛邊個呢，就真係羅生門喇。

《蘋果》問四太梁安琪，佢一聽Yumi反咬猷君背叛在先，已唔願表態：「答都多餘，唔會特別問同瞭解，唔值得去問，我好多緊要嘢去做，要去立法會開會。」

問多句喇，Yumi暗示自己為情暴瘦喎……四太答得妙：「做得明星梗要瘦，搵食靠塊面，唔通似我咁肥好咩，唔會理佢阿仔拍拖嘅嘢。」

講真，猷君咁鍾意Yumi，估計女方一面喺ig繼續自憐，另一面會積極箍煲求復合…囉。不過其所屬唱片公司就表示:「有關藝人的私生活，不予回應。」