林日曦老婆丨the pancakes深潛近5年忽然蒲頭 有新歌準備復出
the pancakes蔡明麗林日曦給發哥的歌
//我要中 我要中 六合彩~我要發達做個有錢人~//
下周四(24日)六合彩重開,有番咁上下年紀嘅香港人,落注時可能都會唱吓the pancakes嘅呢首《我容易中六合彩嗎我》。
有留意the pancakes嘅歌迷,都知道佢好多年冇蒲頭,上次喺佢老公林日曦嘅歌曲《怕死的原因》MV神秘閃現過幾秒,已經被歌迷們催復出。
原本毫無動靜的the pancakes今日竟然真係上返水,佢喺facebook自揭4年多來絕迹社交平台嘅原因,解釋覺得自己只係小人物,冇必要特別宣佈休息,又以為匆匆一別好快會歸位,但最後一休息就休息咗4年幾,the pancakes話對歌曲創作越來越冇信心,對上一首「新歌」已經是5年半前嘅《給發哥的歌》。佢又話好感謝咁多年嚟都仲有人關心,幾年嚟越潛越深,直至今日宣佈會慢慢上返水,並會喺收費平台熱吓身。
the pancakes都有交代未來動向,首先係新歌已經完成咗,好快就會見街,亦都開始咗另一首新歌嘅工作,而佢已經慢慢將啲舊歌擺咗上各個音樂平台;另一樣就係佢上年開始嘗試去日本住同工作,佢話呢個係一直以嚟嘅夢想。不過壞消息都有,佢話今年算係the pancakes 20周年,原本諗過開騷,但佢歸咎自己太軟弱,最終擱置計劃。
林日曦亦都有轉發老婆facebook,佢話咁多年嚟一直都被人指摘「禁錮」老婆,依家the pancakes唔再摺埋,終於可以洗脫呢個「罪名」。
-----------------------------
-----------------------------