日前史卓豐憑「真跑得」攞到個人喺香港第100場頭馬，同日「美麗寶貝」則是他第101Win，佢喺香港策騎三個馬季，取得呢個小小成就，豐豐話自己下目標就係要贏一級賽。

睇番豐豐的101場頭馬，原來都有啲有趣數據，佢同香港所有現役練馬師都合作過，但從來未贏過蔡約翰同告東尼呢兩個星級馬房嘅馬，其中同「蔡神仙」歷來合作14次得5季9落第，Q都未入過，真係幾驚嚇！

豐豐一向心水清，佢都知道呢個盲門數據，騎練於今期(7月1日)第七場二班草地1200米回歸盃合作「精算風暴」，此駒爭季內四捷，正係打破宿命嘅黃金機會。

騎開「精算風暴」嘅莫雷拉，今仗選策「妙算達人」，但豐豐話「精算風暴」近兩仗喺三班橫掃全勝，三歲馬潛力驚人，就算今仗初上二班亦惡氣未減，故蔡約翰一搵佢騎，佢即毫不猶豫say yes。

「精算風暴」賽前由杜利萊試閘跑第二，出賽換上另一位騎師，以蔡廐戰馬嚟講都幾常見，豐豐話蔡神仙報名前估計隻馬可能負120磅以下，或以為杜利萊造不到磅才搵豐豐，結果隻馬負121磅。

雷神下季去日本發展，豐豐如果勝出「精算風暴」，騎練合作帶嚟零的突破，得到蔡約翰信任，泊到呢個大碼頭，下季豐豐成績有力更上一層樓，所以「精算風暴」正係豐豐嘅「考牌馬」。