繼基斯坦奴朗拿度（C朗）喺西班牙超級盃以及沙拉奧拉莫斯喺西甲開鑼戰之後，馬些路上星期六喺皇家馬德里逼和利雲特嘅西甲聯賽亦都領紅被逐，即係話皇馬有三位隊長今季先後領紅，而佢哋今季各項賽事嘅紅牌數字已經超越咗上季全季。

皇馬上季全季都只係有兩面紅牌，但今個本土賽季佢哋只係踢咗五場，首先有副隊長之一嘅C朗喺對巴塞隆拿嘅西超盃首回合兩黃一紅，跟住西甲第一場聯賽作客大勝拉科魯尼亞，隊長沙治奧拉莫斯又兩黃一紅，皇馬已經平咗上季全季拎到嘅紅牌紀錄。估唔到另一位副隊長馬些路喺對利雲特嘅聯賽臨完場前踢謝法臣拿馬背部而直接領到紅牌，話咁快皇馬各項賽事嘅紅牌數就多過上季喇！