政府噚日朝早10點半透過新聞處公開邀請信，首次向在野黨下「戰書」，官員都冇做足功課，新聞稿誤稱余若薇為公民黨主席，實情余大狀係黨魁，黨主席係關信基教授。新聞處一個鐘頭發出更正，新聞處網頁11點46分上載嘅新聞稿，冇搞錯余大狀身份。
呢個破天荒特首論壇萬事俱備，只欠一個主持，與其勞師動眾，八方建議移師維園《城市論壇》舉行，原班人馬原汁原味上陣，謝志峰做主持，維園阿伯、維園阿哥馬草泥等自由入場，絕對公平、公正、公開。
煲呔建議論壇在傍晚6點半至7點半鐘舉行，呢個時間正係TVB新聞時間，若然冇咗一個免費電視台直播，好似世界盃咁俾有線獨家玩晒，對好多小市民唔公道，所以最好調整吓時間，將論壇包裝成大show更佳，既然煲呔想凝聚民意，收視率高啲好喎。
曾志偉係大騷司儀中流砥柱，莊諧並重收放自如，由佢主持政改論壇不作他選，收視率有保證，而且佢主持遊戲節目次次都玩到癲，煲呔要玩鋪勁，獎門人一定幫到手。女司儀方面，呢期《荃家福祿壽》當旺，阿姐出馬包保唔會令人失望，之不過佢係政協，唔使開口都知佢撐政府，公民黨未必收貨。