王祖藍離開無綫後，近年積極向北發展，又泊着邵氏碼頭，合作組經理人公司「手工藝」，今年3月喺影視博覽開記招時，祖藍成個娛樂大亨咁嘅款（新聞連結： http://bit.ly/2yiC0Rg ）。不過，現實都係實際啲好，近日有傳祖藍旗下藝人陸續跳船，黎瑞恩同徐子珊噚晚分別表態（新聞連結： http://bit.ly/2ghoxiP ），今日，輪到林欣彤（Mag）。

Mag今日去商台宣傳新歌，提到好多「同門」跳船離開公司，Mag指自己冇受影響，因為同公司合約仍有一段時間，不過原定今年舉行嘅音樂會，因為之前忙舞台劇同拍劇，唔夠時間準備，所以同祖藍商量後，暫停今年開騷。

問到係取消定押後？Mag話：「係押後，可能係下年。老闆俾好大自由我，每次我準備好計劃，再開會時，佢都會嚟聽，而今年計劃暫時都完成。」至於感情生活，Mag指係零，佢笑指如果按兒時定下人生計劃，今年27歲應該是生BB，而祖藍也不時催佢拍拖，Mag話：「我成日問老闆有冇介紹。」