想知為甚麼這麼多人黑周星馳？請上網google文章，或按「回上一頁」繼續瀏覽即時娛樂，反正近排日日有藝人抽星爺水，一沉百踩是常識（好似係）。

想知為甚麼這麼多人愛周星馳？請繼續讀下去，或請廣傳，因為杜秋棠深信，星爺核心嘅外圍係我哋核心嘅內圍，即係話，我哋嘅生活係圍住星爺而轉。

你了解而且你要繼續，當然抵錫，但無論你按上一頁與否，批評這篇文章與否，你已經無可避免地貢獻了點擊次數，就算筆者幾唔like都改變唔到。就正如無論星爺份人幾縮骨、幾刻薄、幾臭寸都好，佢對娛樂圈、電影圈，甚至全香港市民，都無可避免地作出莫大貢獻。就算星爺性格真係有缺陷，咁又點？講到尾，如果佢肯拍番戲，大家咪又係仆去睇。

如果呢個世界冇星爺，好難想像每日生活點過，但以下30件事肯肯定唔會發生。

1.杜秋棠唔會寫呢篇文章。
2.唔會有「無厘頭」呢個term。
3.港產笑片唔會成為90年代trademark。
4.賭乜賭物嘅搞笑賭片點可能長拍長有。
5.當然唔會有「化骨龍」嘅張家輝。
6.唔會衍生咁多潮語。嗰陣真係識條春咩！
7.唔會有班影癡鑽研星爺電影，又寫論文又剩。
8.亦唔會有人整合星爺經典對白，仲要背埋。
9.台灣Kuso文化唔會咁盛行。
10.邊有咁多「一路好走」呢啲萬能cap圖？
11.溫超（聲似星爺的演員）唔會撈得掂，或者根本冇人理。
12.邊個會識洪爺、如花、蜥蝪仔、醬爆、甜筒輝同汽車維修員呢批綠葉？
13.明白到做人一定要有夢想，唔係同鹹魚冇分別。
14.唔會有咁多星女郎滋潤觀眾眼球。
15.亦唔會有咁多女郎圍住星爺轉。
16.更加唔會有黃聖依、張雨綺嘅合約糾紛出現。
17.冇星爺，相信好多「傍友」生存唔到。
18.亦會有好多編劇冇得撈，或者極速消聲匿跡。
19.唔會令一把討厭佢嘅藝人團結起來。　
20.令年輕一輩認識李香蘭同川島芳子，雖然李香琴並唔係李香蘭個女，川島芳子亦冇殺死丁力個仆街。
21.終於有人覺得袁木好誠實，李鵬係最偉大領袖。
22.袁彌明唔會質黃成智食誠實豆沙包。
23.令茄喱啡明白總有做主角的一天。
24.大台冇得拎星爺電影重播完又重播。
25.唔會有人知唐伯虎有咁多惡行，雖然明知係假。
26.以後講起唐伯虎，第一時間諗起星爺。
27.唔會有人戴口罩踩單車落老蘭。
28.大家應該唔記得「特異功能」嘅存在。
29.呢班「美人魚」邊有咁高見報率？
30.《動新聞》成日用星爺片，冇星爺點算先！

撰文：杜秋棠