【名家搶先睇】下一輪習式升市(晉佳)
港股習近平
正如隔籬鄰舍唐牛話齋,十個有九個半,睇死降準後港股即日彈散收皮,但無懼相反理論,港股都仲要跌。呢種情況,就似足牛市末期日日升、條街人人估得中股市單邊市嘅相反版本,睇嚟呢種絕境唔會維持好耐,但要港股回升,就再要經歷一段大戶低位收集期,欲速則不達。
近排消息面有幾衰,毋須多解釋,反而值得留意中央最近做咗三樣嘢,大概推敲到理想之中嘅下一輪經濟政策主旋律係點,第一,減稅,效果不用多提;第二,連環打壓企業、惠民生政策,包括藥品聯合採購試點壓抑藥價,以及重慶建議取消收燃氣初裝費等等;第三,降準。再加上本來已做緊推動AI、大數據等高科技發展。中央期望未來靠民生消費拉動經濟,難度自然靠炒炒賣賣高得多。不過,無論如何中央都想試咗一個健康發展模式催谷經濟先,預期招數會繼續出,只不過想就咁推郁經濟?失敗機會都幾大。
當知道一切健康招數都唔夠用嘅時候,最後又會死死地氣放寬樓市調控,容許財富效應再度產生。因為,中央始終要向政治勢力、人民、企業進行下一輪派餅,才能鞏固王朝。只要樓市狂牛不死,習帝升市循環會再出現。
為過去幾期做總結,短期要等撈底都應該先諗美股,再觀望出年港股追落後機會。
https://www.facebook.com/advanceguy1