李佳芯、朱千雪、黃心美、李幸倪今日去中環為護膚品牌shiseido宣傳。

今日有傳陳自瑤向王浩信提出離婚(新聞連結： https://bit.ly/2J5Sxe7 )，剛巧李佳芯同朱千雪都同王浩信合作過，對於好友傳離婚一事，李佳芯話：「耐唔耐都有傳，佢哋都未有正面回應，我唔方便講，對上一次合作見面係舊年，見佢各方面狀態好好，冇問佢感情事，如果係事實都覺得可惜，相信佢哋會為小朋友努力維繫感情， 暫時唔會問候打擾佢，等有消息先再決定啦。」而朱千雪就話：「冇留意到消息，之前慧妍雅集見到對方都好開心，心情幾好，我哋合作時候間中都會講屋企事，只知道佢好錫屋企人同個女。」

講完王浩信傳離婚一事，李佳芯就講到工作，佢話連日來喺深圳開拍新劇，天時暑熱佢學當地人習俗飲綠豆水消暑，劇集七月完工， 屆時佢就計劃同屋企人去日本旅遊：「Daddy一向都灌輸唔好食魚生，話冇益，但近日好似開咗竅咁，同我講去日本好呀，會去食烏冬，所以決定一家去日本旅行。」佢話預計男朋友陳鈵銓不會同行，只係一家人去玩。

朱千雪早前展開減肥大計，佢話呢兩日都有人話瘦咗，佢連日做gym運動，現時唔可以再喺37度之下穿長袖衫示人， 希望為咗暑假同天氣可以變靚啲，暫時仍未有勇氣上磅，如果上磅後發現冇瘦過，自己會好氣餒，現時隔日做兩個鐘頭運動，跑步、打拳，希望可以著到小背心同一字膊，仲話：「比堅尼就減多十年都唔得，返唔到以前港姐時狀態，我始終大咗六年，嗰陣時真係好努力。我本人易肥易瘦，就嚟放假希望減定肥先，等第日見到大家唔會唔認得我。」

精選娛聞，喺晒《娛果》
http://fb.com/appledailyent