港股連續第4日上升，雖然只上升63點，但低開高收，證明市底實在好強。恒指噚日最低見17428，下跌115點，但午後鏟上17648，由低位反彈成220點，氣勢好盛，結果站穩在17600之上收市，成交則大增到接近400億元。上周已話過，港股長中短期圖表都已出現入貨訊號，今年年底前，恒指有好大機會上見18300至18500。
噚日推介嘅浩倫（1073），同近日提過嘅金威集團（910）、永成（850），都正在升後整固。
金威將會改名為中國林大資源集團，收0.58元，跌1仙，日日成交都有幾千萬股，好易轉身，睇勢整固應該已接近尾聲，一升破0.60元，目標係0.70元。永成收0.65元，跌1仙，見0.69元高位後已整固3日，一升破0.67元而又有大成交配合，可追進，短線可見0.80元。永成進軍石油開採業務，若成功轉型，股價起飛嘅動力不容小覷。
浩倫連續上升3日後，噚日停一停，好健康，可吼位收集。06年度（6月年結）業績應該幾理想，每股盈利估計9.2仙，更吸引嘅係佢有好大機會被外商睇中（在內地農貿市場有超過3000個分銷點），股價隨時會倍升。

大戶已收夠貨

另外，近日推介股走勢已出現突破嘅有光大國際（257）收0.92元，升5仙，短線目標1.05元。06年全年，光國盈利料大升，每股盈利16.7仙，公司唔排除會派發特別股息。
華基光電（155）升勢再起，收0.65元，升3仙，成交大增到4000萬股，呢輪大戶在0.60元水平已「索」夠貨，相信好快會發動攻勢，短期阻力係前高位0.68元，一衝破，升浪即可確認，照度上去，初步上升目標係0.90元。上月初推介華基，當時股價0.59元，其後升上0.68元後就調整3個禮拜，今次捲土重來，可訂止蝕位0.60元及上移止賺位持有。
郭兆誠