劉青雲同太太郭藹明噚晚喺中環置地廣場出席Tiffany & Co.活動，佢哋今晚一身藍色為主調嘅衣着配合番個品牌。郭藹明今日穿戴共322萬嘅鑽飾，當中更有一隻3.2卡嘅「巨鑽」戒指，價值192萬。

劉生劉太接受傳媒訪問，被問到二人經常都俾人一種處於新婚嘅甜密感覺，青雲話：「傳媒俾面啫，今日套衫我都有份揀嘅，同老婆兩個一齊揀。」青雲更笑言：「我本身都好有眼光㗎。」記者話所以先揀到個咁好嘅老婆，青雲就笑笑口話：「OK啦，OK啦。」

咁青雲平時有冇送下鑽飾俾老婆㗎？青雲笑言：「初初有送啲啦，熟咗之後就……」欲言又止咁喎。

問到青雲佢上年係咪喺西貢買入三千幾萬嘅dream house送俾老婆？青雲話：「香港每日都有人買屋㗎啦，好平常嘅事，我自己又要住，咁啱佢又冇地方住。」咁間屋係咪郭藹明揀㗎？青雲就話：「係大家一齊睇，唔係送嘅。」

再問青雲係咪開咗製作公司叫「小飛船」送俾老婆？青雲就笑言：「個名邊個改㗎！其實個名都係順口講㗎啫。」講到用「小飛船」做公司名好冧，仲冧到好多讀者，青雲就話：「大家開心就最好喇！」其實小飛船呢個名嘅由來，係源自佢喺金像獎做影帝嘅感言。(相關連結：　 http://bit.ly/1V2e89W 　）

咁Amy有冇參與「小飛船」製作公司？Amy話暫時未有特別工作。咁青雲會唔會開戲俾老婆呀？佢話：「唔會囉，呢個係工作嘅平台。」咁青雲會唔會自己做導演？佢話：「暫時未有咁嘅計劃，都係一個平台。」

咁會唔會有建造「小飛船2」？青雲話：「暫時冇。」至於今次投資幾多錢？青雲話：「(公司)只係方便自己工作嘅一個平台，啱啱開始嘅一個計劃。」郭藹明在旁補充多句：「唔係大飛船。」

真係字裏行間都見到劉青雲同郭藹明嗰種sweet呀！