現年22歲嘅韓國男團U-KISS前成員東浩，去年11月同大佢一年嘅圈外女友結婚，兩人奉子成婚，老婆喺5月為東浩生咗個男嬰，早前東浩仲大晒一家三口嘅合照，認真幸福。

而東浩都好識O氹老婆，為咗老婆開心唔介意着女裝，老婆更變身做化妝師幫佢化個靚妝，相當搞笑。東浩前日喺Instagram上載咗自己老婆嘅「作品」，相中佢着住背心低胸裙、戴晒耳環同頸鏈咁，又留言寫住：「如果令大家感到不適好抱歉。老婆話太悶想玩，所以幫我化到公仔咁。因為老婆鍾意所以我都好滿足。」然後再加上一堆笑樣，睇嚟佢真心Enjoy畀老婆化妝嘅過程。

粉絲雖然一開始見到東浩嘅女裝有嚇一嚇，以為佢受咗啲咩刺激，不過睇埋東浩嘅留言，都覺得東浩好Sweet，又讚佢女裝好靚，更有粉絲話想要有個東浩咁嘅老公添，真誇張。