皇馬喺星期一晚西甲重開即作客3:2贏基達菲，不讓巴塞隆拿專美，同樣小勝輸盤，但就肯定喺聯賽同巴塞帶出。除咗基斯坦奴朗拿度（C朗）慣常係比賽搶鏡人物之外，卡卡復出亦係皇馬嘅喜訊，但同時亦有希古恩可能收咧嘅壞消息，可謂悲喜交集。
C朗喺基達菲身上入兩球，已經喺射手榜再次領先最強對手美斯，以球員個人嚟講暫時係最強。C朗繼續搶鏡就唔係意外，但另一皇馬巨星卡卡嘅復出，就成為比賽另一焦點，皆因呢位巴西中場有成半年冇喺球場亮相，就膝傷一直休養；而今次登場，總算為皇馬前線提供多一個選擇，唔使咁快踢殘同位置嘅奧斯爾。
其實，摩連奴希望卡卡嘅回歸，使大軍陣容更加強大，有得同巴塞鬥到底，但萬萬估唔到希古恩嘅背傷情況會咁嚴重。呢位阿根廷前鋒已經返咗馬德里，準備喺周二較後時間接受詳細檢查，球會總監華丹奴亦講到報告出嚟後，就可以決定希古恩使唔使做手術，如果動刀，最壞嘅打算就係提早收咧，即係話摩帥一方面有番卡卡，另一方面就冇咗希古恩，都咪話唔頭痕。

摩帥睇中多哥球王？

由於賓施馬表現始終唔穩定，摩帥已經有晒心理準備搵個前鋒頂替希古恩，西班牙傳媒亦一早預測邊幾個最有機會「上艦」，其中喺曼城冇得踢嘅艾迪巴約最近傳得最熱。
艾迪巴約呢位多哥前鋒離開曼城幾成事實，亦有好多間球會斟佢，而摩帥喺執教車路士時，引入杜奧巴非常成功，所以今次都想照辦煮碗，用強力非洲前鋒喺前線衝鋒陷陣，不過曼城要等正式落實收購迪斯高，先會考慮放人。