周五歐洲區世盃外踢咗9場波，無論睇戲碼定睇戰果都未必太多球迷關心H組呢場波斯尼亞主場0:0悶和希臘，其實呢場波絕對係名副其實嘅激戰，真係打出火嗰種激！話說兩軍喺首循環交鋒時，有希臘球迷舉起法西斯標語，並刻意勾起1995年Srebrenica造成8,000位波斯尼亞穆斯林死亡嘅大屠殺回憶。

唔知係咪有仇報仇，波國主場球迷呢場一開波就狂噓希臘國歌，完場後羅馬隊友迪斯高同文路拿斯背負國仇家恨一樣冇情講，互相講手推撞之餘，效力尼科西亞嘅希臘國腳基安尼奧達斯（Giannis Gianniotas）更疑似俾波國助教打甩牙，文路拿斯賽後揚言會追究到底：「當局一定要採取行動。佢哋唔尊重我哋嘅國歌，呢啲嘢無關足球。」