【李八方online】低智藍絲投訴廉署出醜！辦事處「榮光」盆栽取材日本卡通片
蘋果日報 2021/01/22 22:19
李八方online廉政公署藍絲敗者榮光Gundam卡通動畫
藍絲頻頻出動做紅衞兵，各大機構人心惶惶，皆因佢哋「有殺錯、冇放過」，不時傷及無辜，但當然亦凸顯佢哋有幾咁高嘅水平。
最近中彈嘅係廉政公署，話說藍絲群組近日瘋傳，廉署九龍灣分部公然支持「港獨」，鐵證如山。到底係咩鐵證？原來佢哋辦事處分部放咗棵小盆栽，而個花盆上竟然有「榮光」字眼，不容抵賴，據聞唔少藍絲已經去信廉署投訴，做好國家嘅好兒女！
八方睇過藍絲疫傳張相，個小小花盆的確印有「榮光」二字，但細心一睇，其實仲有兩隻字見唔到，完整係有四隻字：「敗者榮光」。咦，之咪就係Wing Gundam系列故事劇名《敗者榮光》？當然藍絲作風梗係，有理無理投訴咗先.......
廉署回覆八方嘅查詢時就話，擺放相關小盆栽嘅位置，屬於廉署東九龍及西貢分區辦事處接待公眾嘅地方。廉署社區關係處人員初步了解後，得悉小盆栽屬該分處一名文職人員個人擁有，而盆上共寫有四個中文字，嚟自一齣日本卡通動畫。發言人話呀，署方已即時要求呢位文職人員將盆栽移走，並向各分區辦事處員工重申，唔可以將私人物品擺喺公眾地方，強調會按既定程序，嚴肅處理及跟進上述個案。
有藍絲喺網上討論區大鬧ICAC，問佢哋係咪仲以為效忠英女皇。不過睇返ICAC官網，佢哋就表明係獨立運作，又話不論犯案人嘅背景、身分同地位，都會竭力追查犯案人嘅身份，咩藍絲唔係好信政府講嘅野㗎咩？網上討論區截圖
藍絲喺網上瘋狂分享，放大到張相起晒格都一於照PO。互聯網圖片
八方以爲個盆栽好鬼大，仲夠膽明目張膽放出嚟。點知......八方畀幾秒時間等大家搵佢出嚟啊。互聯網圖片
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！