慳電慳唔成，反而搞出大頭佛，逼迫市民喺社會發出「嘈音」，煲呔俾環保組織封咗做「氣候逃犯」後又孭多個「聲音污染」罪名；雖然未致於要跪玻璃認錯，至少都要喺環保方面有啲表示啩？綠色和平都算唔話得，呢個月瞓身幫煲呔搞「1人1蚊」籌款活動，籌夠錢就可以喺下個月貼埋機票「送」煲呔去丹麥哥本哈根開國際氣候會議。由市民出錢買嘅機票唔會有何利益輸送，煲呔大可放心接受。

聯手對抗氣候變化

綠色和平簡直係煲呔「好朋友」，佢哋年中喺政府總部掛咗張印有煲呔肖像嘅「氣候逃犯」大橫額，惹嚟唔少外國傳媒跟進，簡直幫煲呔喺國際提升知名度，都算好幫手。
呢排可能見煲呔又陷於民望低潮，好朋友係時候出招幫佢力挽狂瀾。綠色和平喺今個月內發起名為「1人1蚊送特首去哥本哈根」嘅活動，顧名思義就係呼籲全港市民1人捐出1蚊，等佢哋可以籌夠足夠機票錢，免費請煲呔喺12月去哥本哈根參加國際氣候會議，同其他國家地區聯手對抗全球氣候變化！
八方問過行內人，知道一張去哥本哈根嘅機票大約1萬蚊，換言之有10,000個市民捐錢已經夠數。不過就算籌唔夠數，綠色和平都會包底，致力完成呢項「善舉」。
佢哋噚日特別喺銅鑼灣行人專用區舉行啟動禮，何秀蘭、李永達同甘乃威都有撐場，仲1人拿住1個大1蚊銀，掟入紙板煲呔嘅口入面，現場唔少市民睇到大快人心，即時都攞個1蚊雞出嚟「掟」向煲呔。觀乎噚日現場反應，相信成功籌到10,000蚊唔係難事喎。有興趣捐錢嘅市民可以到綠色和平網頁（ http://www.greenpeace.org/china/ch）睇吓詳情。

可執定包袱等出發

綠色和平項目主任古偉牧話，特區政府至今仲未公佈有關氣候變化嘅顧問研究結果：就算煲呔去到哥本哈根都係兩手fingfing，認真失禮。但有去始終好過冇去，希望煲呔可以執定包袱準備出發。

mailto:[email protected]