少爺占嘅棟篤笑騷噚晚喺北角新光戲院演出尾場，啱啱喺北極跑完馬拉松嘅梁烈唯就做嘉賓，阿占以朱豔強身份介紹唯唯喺衣櫃出嚟：「佢靚仔又有六舊腹肌，眼好大，佢叫唯唯...你做乜咁密實着皮褸。」唯唯聽到即除咗皮褸得件恤衫，阿占講笑話林一峰前一晚做嘉賓知道唯唯做嘉賓，就托阿占摸佢隱約露出嚟嘅腹肌，而唯唯亦坦認曾經俾男仔追過。

騷上阿占辣着唔少圈中人：「知唔知吳彤係邊個？o岩o岩舉手話係基佬o個個。城城做gym張海報條褲好短，我成日幻想佢做運動時條褲會跌，但幻想得太多我怕變小美。我同華仔係有分別，因為結婚我會認。」嘩，真係句句都寸爆啵，少爺占真係膽生毛。當晚阿占老婆Tina亦有到場支持。完騷後問阿占怕唔怕小美嬲？佢講笑話：「我愛佢，我哋愛城城，o依家乜話題都扯向城城啦。」