韓國組合EXO中午殺到嚟香港，準備舉行佢哋下月1、2號喺亞洲博覽館舉行嘅演唱會。歌迷一早就頂住酷熱天氣警告到場霸位，近300人又撥扇又用退熱貼降溫，仲準備晒十大武器之首：摺凳，嚟方便企高望Oppa吖嘛。

EXO嘅成員未到，差人同保安夾埋成30人已經到場準備，佢哋成員12點幾就喺近身嘅韓籍保安保護下現身，雖然同粉絲都有啲距離，不過啲成員都有向粉絲揮揮手，現場嘅粉絲就梗係嗌到拆天啦。

頭頭尾尾十幾個成員，加埋出現都係得一分鐘到，之後就同工作人員坐五架褓母車同一部小巴去到酒店。不過仍然有粉絲租用客貨車追星。之但係由酒店去會場都係一分鐘車程，呢班妹豬似乎就有啲嘥錢喇。

EXO返酒店休息咗一輪之後，大概4點半就出發去咗機場博覽館綵排，其間粉絲租嘅18架客貨車亦都一齊追車。