巴塞隆拿上周中喺歐聯慘吞巴黎聖日耳門四蛋，諗住返到聯賽對住升班馬雷加利斯可以大勝一場，點知佢哋喺呢場周日西甲陷入苦戰，最終靠美斯梅開二度，包括完場前射入12碼先險勝2:1，表現令人好失望！

近期深受壓力嘅教練安歷基今場作場多個調動，碧基、佐迪艾巴、布斯基斯同恩尼斯達等全部被收起，但開波4分鐘就憑「MSN」一次合作，蘇亞雷斯傳畀左路嘅尼馬，後者傳中畀美斯輕鬆射入，巴塞領先1:0。以為順風順水，其實要不是門將達史特根屢救險球，巴塞早就被逼和，卒之去到71分鐘都要失守，雷加利斯後備入替嘅中場烏尼盧比斯同樣接應左路傳中撞射入網，扳平1:1。

可惜，全場表現出色嘅雷加利斯守唔到尾，守將馬田文度雲尼89分鐘喺禁區內踢跌尼馬，球證直指12碼點，美斯操刀抽上角破網，令巴塞險勝2:1完場，23戰得51分升上次席，落後榜首踢少兩場嘅皇家馬德里一分。