近年主力喺大陸發展嘅湯寶如（湯記），噚日就好嬲嬲豬咁喺微博貼咗張相，然後留言話：「太過份了。這是私人交易。怎可以把這相片和文件放在微信和微博。亦可能再有放上其他平台上。一切以法律追究。」

原來湯記之前簽咗份授權書，委託一間公司代表佢同客戶傾一個代言工作，點知佢攞住委托書影嘅相，竟然俾人喺微博同大陸幾個社交平台公開咗，最嬲係連佢嘅回鄉證號碼都公開埋，激到湯記即刻喺微博留言鬧爆，好彩有關客戶都即刻做嘢，噚晚嗱嗱聲搵咗個負責員工出道歉信同湯記道歉，承認係佢個人疏忽令到湯記嘅個人資料喺網上被公開。

《蘋果》今日搵過湯記，佢透過WhatsApp回覆話：「之前係嬲架，因為呢啲資料係唔應該公開嘅，唔知點解會咁，不過佢哋都公開道歉咗，大家會繼續合作，但真係唔想再有呢啲事發生。」湯記又話，O依家好多人都唔介意將自己每日嘅行程同生活全部公開，但自己就唔係咁鍾意，同埋呢啲真係好私人嘅嘢！」