曼城上周六硬啃車仔6隻光蛋，領隊艾歷臣醜過周日喺彌敦道當街甩褲！球隊防線備受抨擊之際，呢隻黑鑊肯定由門將赫特孭，賽前突然被借畀英冠卡廸夫城嘅門將卡斯柏舒米高（小舒米高），就梗係由心度笑出來啦！
現年20歲嘅赫特，比小舒米高仲要細一年，上月底3:3和富咸之後取代對方正選地位，之後4場比賽失2球踢得有板有眼，點知今仗對勁旅車仔即刻現形。佢同舒米高父子最唔同係，面對單刀波唔夠凶狠，唔識得用「星形撲救」，結果被對手通大細，今仗就有4球波都係咁輸！

艾歷臣已棄小舒米高

領隊艾歷臣賽後用「嚇死人！」嚟形容球隊防守表現，大有卸膊嘅意圖。講真，小舒米高雖然手法唔算正宗，但開季表現出色，曾350分鐘不失球，對勁旅阿仙奴更加撲出12碼，點知艾歷臣竟然改用赫特，對車仔賽前仲將小舒米高借畀卡廸夫城！讀者們你哋話邊個抵鬧先？
不過，艾歷臣呢位老牌領隊特別愛面子，佢賽後話：「我都未試過輸得咁大鑊，對上嗰次都係1:5負阿仙奴（1980年歐洲盃賽冠軍盃，當時任瑞典哥登堡教練）。」仲有，當佢見到看台上睇波嘅班主他信居然笑騎騎，呢個老江湖仲唔鬧球員向老闆交代咩！
呢次赫特揩嘢，除咗小舒米高心凉外，瑞典籍後備門將伊沙克臣亦可望獲得首次上陣機會，斷估同鄉艾歷臣唔會咁絕情啩？不過我求大俠勸伊沙克臣盡快爭表現，唔好學赫特咁孭黑鑊，因為買人唔使本嘅艾歷臣1月好可能買新門將，到時就難翻身㗎喇！