六四事件挺「鄧」，今日挺「董」，做奴才就做奴才！我……挺……董！（不是花中偏愛「董」，「董」花開盡歎無花）。
尊貴的董生繼續激昂地闡述新精英如何巴閉，桌上同學，為起不起身鼓掌爭論不休，肚內的兩條蛔蟲，因飢餓過度應聲作響——
阿蟲甲道：「董生笑罵由人，任勞任怨，佢都話唔要掌聲咯！莫講起身咁大動作，就算拍掌都嫌嘥力！𠵱家餓得咁淒涼，慳得就慳！」
阿蟲乙道：「曾司長話唔要掌聲，查實係想將好嘢留番畀老細。董生又話唔要，咁掌聲畀邊個？唔通畀我哋嘅主人？佢已身敗名裂，家空物淨，攞掌聲嚟有屁用！」
阿蟲甲醒目兼醒覺地道：「係噃！呢啲咁好嘅嘢一定要留畀董生，皆因有權無勢，冇人同你共濟；有權有勢，就好似『sir』滑梯碌四方木咁『過制』！」
阿蟲乙囂張地道：「悟則一切悟，迷則一切迷，你終肯開竅。」
阿蟲甲佩服地道：「莫講叫我起身拍掌，就算趴地拍掌都得！只要能令董生進步，火裏火裏去，水裏水裏去！董生好就香港好！」

李澤鉅正襟危坐
阿蟲乙權威地插嘴：「重有！香港好就董生更加好！再讀一次——董生好就香港好！香港好就董生更加好！」
阿蟲甲充滿智慧作結：「榮兮辱所倚，辱兮榮所伏！」
特首講話完畢，掌聲滿場，但無人起立。餓得要命，望向隔籬枱，見到李澤鉅正襟危坐，未知今日董生有沒有帶澤鉅哥過馬路？有沒有教澤鉅哥睇燈位呢？
再望右邊，見到新財爺松哥。咦！何解鄭大班都喺度？港大九十周年又關你事？莫非座上有精英要大哥你為佢請命？再望幾張枱……。
按：最近多方傳媒約訪，在此敬謝！一個欠債不還，言而無信，狂妄自大，累人累己的失意人，何解會咁紅？可能是潮流興!?
一張白紙一支筆，一個專欄一條心，一家五口一間房，一條爛命一棚骨。飯都未食，未宜食甜頭——頂上紅冠不用裁，一身清白走將來，平生總愛多言語，但願，一啼——叫得千門萬戶開！


電郵：[email protected]


每日連載刊出