方大同噚晚喺會展舉行演唱會，回顧入行10年，唱到尾段encore時，方大同清唱《IJustCalledToSayILoveYou》，再唱多兩首先完場，鄧紫棋(G.E.M.)都有嚟睇騷，去埋後台同一個樂壇新人曾若華影合照。

宇宙巨G.E.M.罕有接受訪問，表示：「同呢個女仔一早已經識，今晚係嚟睇方大同同睇茜拉，因為知道茜拉呢幾日嚟香港，不過約佢，就俾佢拒絕咗，佢要嚟做方大同嘅嘉賓，所以就嚟睇騷。」

近日被影到約緋聞男友馮允謙行街，噚晚又同馮允謙一齊睇騷，G.E.M.解釋：「一直大家都係朋友。」G.E.M.否認佢哋拍拖，暫時自己以工作為重，係唔係馮允謙條件差啲咩，G.E.M.稱：「唔係差啲咩，不過我好忙。」強調馮允謙冇追緊佢，又話嗰日被影到同馮允謙行街，當日有約其他朋友，但係啲朋友遲到，佢哋要做完嘢先嚟。

被問係唔係G.E.M.比較準時到，G.E.M.即笑言：「依家好準時㗎!」係唔係改咗遲到呢個懷習慣，G.E.M.就話係溝通問題，其實一向都盡量準時。