古人就覺得雙頭蛇係惡兆，見者必亡，現代人梗係冇咁迷信，讀者莫先生飼養嘅非洲慈鯛，喺上周四生咗條雙頭魚BB，佢仲覺得幾得意，一啲都唔驚。記者日前見到雙頭魚BB真身，雙頭魚B雖然游水時右邊個頭側向下，舂吓舂吓，但就好生猛，不時游來游去。
莫先生話初頭都唔為意有條雙頭魚BB，因為非洲慈鯛一胎生成50、60條魚仔，睇睇吓先發現到佢有兩個頭，小朋友見到仲覺得好得意，成日留意住佢嘅動向，不過未諗到同條雙頭魚BB改咩名，見到咁莫先生都決定盡力養大雙頭魚BB。

𠵱家雙頭魚BB被隔離中，莫先生解話指雙頭魚BB雖然好生猛，但游水時盲舂舂咁，話驚佢會被其他大魚恰。莫先生話雙頭魚BB父母，係好多年前喺金魚街買嘅袋裝魚，原本買俾仔仔養，養咁耐都好正常。
香港魚類學會會長莊棣華話，人有雙胞胎，魚都有雙胞胎，而雙胞胎魚嘅胚胎，如果分裂到頭部就停咗就變成雙頭魚。莊棣華話，雙頭魚由兩個腦發出指令，有機會影響活動能力；而且唔知係咪兩個腦都正常功能，所以養大嘅機會唔高。提醒主人盡量唔好嚇親佢，免得佢亂咁游，撼親個頭。
莊棣華話呢啲雙頭魚唔係非洲慈鯛獨有，喺其他品種嘅魚都有機會出現，近幾年世界各地就有人發現雙頭鯊魚，最多嘅品種係青鯊，亦有人發現其他物種嘅雙頭動物，包括雙頭牛、雙頭羊、雙頭鱷魚、雙頭貓等，種類多都你唔信！非洲慈鯛出名係觀賞魚類，因為佢有豐富嘅身體顏色，有啲品種甚至會係口入面孵化，佢哋性情活潑，喺魚缸養住佢哋直頭賞心悅目！