韓流天王Rain今年1月與拍拖多年嘅演員女友金泰希拉埋天窗，兩人5月時公開金泰希懷孕15周嘅喜訊，早前Rain夫婦更去意大利進行「胎教旅行」，而金泰希嘅預產期係下月尾或11月初。

於意大利低調旅行嘅Rain夫婦，一直到噚日先被網民捕獲。噚日有網民於羅馬機場捕獲二人，目前懷孕7個多月嘅金泰希，穿上黑色連身裙現身，一直用袋遮肚，更跟Rain戴情侶帽及黑超示人，低調晒恩愛。