黃美棋今日以宣傳大使身份，喺中環出席奧比斯「世界視覺日」啟動日，剛由歐洲返港嘅美棋，佢透露此行同男友鍾健威去參加朋友婚宴，佢話：「去感受下喺城堡行禮係點。」問到男朋友威仔有冇求婚？美棋話：「梗係冇，冇咁快，我哋一年都未夠。」

美棋表示古堡有千幾年歷史，所以住嘅時候都好驚，問到威仔係咪陪瞓？佢笑住話：「唔係陪瞓，係陪去，幫我影相。」美棋透露之後仲有去埋布拉格、意大利同巴黎，佢大讚威仔好浪漫，佢話：「因為我8月25日生日，所以佢訂咗束花畀我，好多朋友都以為佢求婚，但點知佢死都唔求。」