曾經喺無綫做咗28年劇務嘅洪一鳴(綽號一鳥)，間中都有客串拍劇，好似《衝上雲霄》同《單戀雙城》嘅「椰青哥」。不過，一鳥喺2014年被余詠珊勸退，離開TVB。但佢同唔少圈中人依然稔熟，經常會喺微博貼上與藝人嘅合照，好似任達華、曾志偉、譚詠麟、古天樂、張智霖、袁詠儀，大台小生花旦陳展鵬、洪永城、胡定欣、岑麗香、鍾嘉欣、陳敏之等等。

有消息指，一鳥近日爆血管入咗ICU，至今仍未過危險期。今日陳展鵬都有喺微博留言送上祝福﹕「願平安渡過今次難關，你要加油！用你的意志力打贏呢場仗！大家都會幫你打氣，祈求平安！@一鳥Onebird。」而一鳥電話一直未有人接聽。

近日楊思琦返大陸工作都遇見過一鳥，當時一鳥仲好精神，思琦聽到對方入院消息都好愕然，思琦接受《蘋果》電話訪問時話﹕「我唔知呀，但聽到都好擔心，佢份人好好，見面都有傾偈同影相，希望佢好啲冇事好番啦。」