唐詩詠今日喺銅鑼灣名店坊出席TISSOT活動，詩詠以火紅色裝束現身。講到鄭嘉穎同陳凱琳婚禮日期及有BB已經係公開事（相關新聞： https://bit.ly/2LD5q0G）。

有指唐詩詠會參與婚禮，問到佢幾時起程去峇里參加婚宴，佢話：「哎呀，未呀，朋友都係聽指引，如果真係要飛會即刻飛，我8月同9月都分別攞咗五日假，原本係自己放假，唔可以講太多，係佢哋嘅事，我都係等通知，亦都冇問任何嘢，佢哋需要好大空間去處理，總之有咩搵我我就做，要飛就即刻飛。」

至於係咪兄弟團之一？唐詩詠就話：「我唔知件事係點，交畀佢哋處理，等佢哋出聲，我哋乖乖哋聽話。」換言之隨時stand by？佢話：「由一拍拖開始每日都stand by畀佢哋，希望有呢日。（係咪傳聞中嘅雙喜臨門？）真係唔知道，唔夠膽問，因為敏感，最多三個月後我先問啦。（驚BB小器？）唔知道唔好立亂問，世界上只得佢兩個知，大家估下啦。」早前已經有人率先爆料指陳凱琳有bb仲去產檢，詩詠話要等當事人親口講先至相信，唔會信傳聞。

至於會送咩禮物，唐詩詠就好醒目tag番個活動指會送一對錶，天長地久，愛是永恆，但好朋友低調搞婚禮，搞著身邊朋友，唐詩詠就力撐：「做朋友就兩脇插刀，咩事都支持，始終係佢好個人嘅事，佢有咩選擇我都順應，但唔知咩事就唔會問，作為朋友最好就係咁。」再三追問佢係咪八月會飛峇里，唐詩詠連番表示唔講，明顯接咗禁口令，佢都係嗰句「你知我唔講得」。

精選娛聞，喺晒《娛果》
http://fb.com/appledailyent