【英國返港】森美為兒子做足隔離措施 寸檢疫手帶未能即時啟動
蘋果日報 2020/03/23 13:10
森美隔離兒子
（IG圖片 / 資料圖片）
商台DJ森美日前安排在英國讀書的兒子返港，昨晚他在facebook貼出在家裏為兒子準備的「隔離中心」。今早森美在電台節目《早霸王》中，提到這個「隔離中心」在走廊的一邊，入面有房有洗手間，亦有一度門阻隔，這裏沒有中央系統，兒子在房中被隔離，他說：「如果佢出嚟就要戴口罩，入面嘅洗手間得佢一個用，飯餸放喺門口外面張凳，放低之後敲敲門，同佢通話係講電話或者大嗌，今日會攞佢（兒子）嘅深喉唾液去檢驗，屋企人拎去衞生署指定嘅診所做檢驗，佢會收番錢，手續費百五蚊，因為要檢驗嘅人好多，所以化驗時間就會長啲，但14日內一定會有結果，如果驗咗出嚟係陰性，隔3日會再驗多一次，我哋屋企人就暫時唔會驗住，但如果佢第一次驗到有，咁唔使諗啦，我哋全部都要隔離，如果佢驗咗兩次都冇事就安心，但係唔代表冇，因為我爸爸媽媽隔離嘅時候都驗咗3次，最後仲要抽血驗埋抗體，先至離開得駿洋邨檢疫中心，所以大家要自律。」
他指兒子的檢疫手帶，昨日仍未能啟動，森美笑言最擔心14日之後才能正式啟動，他說︰「14日又14日，不過我屋企都慣。」談及英國拒測，森美說︰「初頭覺得有冇搞錯，而家覺得都幾蠱惑，蠱惑嘅地方係所有海外學生全部走晒，減輕咗醫療嘅成本，我屋企嘅小朋友嘅學校都係，早兩、三個禮拜，已經出信叫外國嘅學生返屋企，如果你擔心可以上網上課，咁我哋先至買機票，但佢冇停課，後來爆發得勁嘅時候，香港啲人開始搶機票，好肯定叫啲學生走，唔係個別學校做嘅事，應該係政府落嘅政策，未做任何政策先暗地裏叫你哋走先，同一時間就話我唔會醫，啲人走晒，跟住開始關學校，最重要係佢哋話唔考試，因為大部份家長嘅擔憂唔係返唔返學，最重要係考唔考試，佢先停考試，咁唔返學都得啦，我又覺得幾聰明喎！呢個部署就因人而異，因為有爭議嘅地方，好唔好我就唔識喇！」
對於外國人不戴口罩，森美表示︰「以為外國返嚟打不死，喺外國個個都唔戴（口罩），我有個朋友每個禮拜都走入去愉景灣，佢話因為嗰度冇人戴口罩，我話嗰度冇人戴口罩，嗰度冇病咩？邊有咁奇怪㗎！我自己都去過外國，個個都唔戴口罩嘅時候，你覺得人哋唔驚我咪唔驚囉，係好基本嘅羊群心態，所以我朋友喺愉景灣過得好開心，直到確診咗幾個。」他呼籲大家要戴口罩，尤其是這兩個星期盡量避免外出用膳。
他的兒子日前從英國回港，正接受家居隔離。（資料圖片）
森美在家中為兒子做足家居隔離的準備。 （IG圖片）
森美父母早前乘坐「疫船」鑽石公主號，而在日本滯留返港曾被送往駿洋邨隔離。（資料圖片）