兩岸合作搞到妍希BB成炮灰？咁慘？兩岸合作放煙火呀？

今次兩岸係合作拍電影，台灣文化部同內地合作，夾埋拎4千萬港紙(下同)出嚟拍一部戲，戲名叫《花漾》。合約訂明，內地拎1千萬港紙投資，至於台灣文化部加埋導演自己投資就總共約3千萬。一開始已經有人鬧爆，指內地只係出四分一資金，就可以獨攬內地市場利潤；而台灣就要等內地票房超過1千3百萬，先至可以分紅。但監製王莉茗就話，台灣已經收咗1千萬，咁即係就算蝕到喊都好，坐底都收番1千萬先啦。

套戲卡士有言承旭（Jerry）、陳意涵、陳妍希、鄭元暢雙生雙旦，號稱係台灣15年來第一部古裝片，妍希BB仲話，《花漾》係佢從影以來最苦嘅一部。係咁喊。結果呢，部戲由去年12月28日上映，一周累積票房，連100萬港紙都冇。唔少台灣網民笑爆妍希BB同Jerry嘅扮相。上映一個禮拜，票房已經唔掂，仲要cut場次。

導演同監製都寄望海外地區票房，而內地就係下月上映，話唔定觀眾會buy。不過，由龍應台揸fit嘅台灣文化部就有麻煩，因為《花漾》係由文化部成立嘅「台灣文創一號」負責同內地傾、同文化部拎錢拍呢部戲，依家「文創一號」被指拎納稅人嘅錢自肥。依家班官員忙住出嚟解畫，仲有邊個得閒諗計救票房呢？

【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 (電腦版)
http://bit.ly/ent_m2012 (手機版)