最近人人談論傑青，女傑青黃仰芳未夠30歲就供斷層樓，相當巴閉。噚日上市新股展程控股（8240）行政總裁（CEO）胡淑君都唔弱，佢今年只係33歲，副學士畢業，做過7年港龍空姐，今日已經成為一間市值46億元公司嘅CEO，可謂真．傑青，佢嘅故事夠晒勵志呀。
胡淑君樣子娟好，呢位80後2004年喺香港大學專業進修學院取得文學副學士學位，畢業後去過一間專做蔬菜批發嘅貿易公司工作，2007至2014年就做港龍空姐，升到做機艙事務長㖭㗎，隨後佢加入展程做銷售及營銷經理。

老闆由大廚做起

展程做乜㗎呢？佢同胡小姐做開嘅工作都幾唔關事，公司專門提供蔬果加工服務，即係洗好、切好蔬菜，然後交貨畀餐廳，舊年收入有1.7億元，賺過千萬元㗎。招股書形容胡淑君「精通多種語言並富有溝通技巧」，可能因此幫公司搵到好多生意，今年中升為CEO，年薪60萬元。
佢老闆，即係公司創辦人廖子情又係另一個勵志故事。廖老闆做過10年大廚，1993年自己開食品貿易公司，一路做到今時今日，公司上埋市，佢成為上市公司主席，幾架勢。噚日展程掛牌，市值46億元，佢佔56%股份，換言之佢家陣有25億身家，都叫大家唔好淨係諗住買樓㗎啦。

李華華
mailto:[email protected]