「羅德學人」好難攞，色鬼總統克林頓天才橫溢，係其中一位；爭做民主黨總統候選人失敗、前北大西洋公約總司令克拉克將軍係西點軍校高材生，係另一位。去年一份美國報紙講克林頓家鄉阿肯薩斯州，為咗訓練本州大學生爭取「羅德學人」，有一個好嚴格嘅培訓計劃，專為有志之士而設，但係對唔住，十次爭唔到一次噃。
中文大學學生過去八、九年之中，好似得到六次「羅德學人」，中獎機率高到令人難以置信，唔通其他大學嘅學生冇心機去爭？今年得主馮小姐，睇相片就似足一位天真爛漫、不知世間疾苦嘅中學生，據講佢啲會考高考成績好巴閉，中大成績卓越，但睇佢對記者講嘅說話：「自七一後，民建聯區選慘敗，足見民眾容易被煽動。」「本港不宜於○七年進行普選」，「台灣方面，大眾未明白何謂真正民主時，不應該受政黨煽動，而作出一人一票的投票。」呢啲說話，證明羅范椒芬講「求學不是求分數」十分正確。呢位馮小姐，讀書叻，思考單純，大概未上過中大名師李天命嘅課。好彩佢係讀繙譯啫，不忍深責，希望佢到牛津之後，俾名師開竅，從PPE課程中，領略何謂民主政治，牛津歸來後重講呢啲說話，前途未可預卜。