有盃王之稱的練馬師大摩，剛周三谷戰為田北俊女兒女田啟安的「盈威勇士」建功，手風正順，今期周六(15日)沙田日馬，大摩當然希望繼續有進帳，延續旺勢。大摩接受訪問時就露了口風，話好希望在樂聲盃包Q。
第八場一班1400米樂聲盃，外界大多認為蔡約翰馬房的「戰利品」機會一枝獨秀，不過大摩就有唔同睇法，佢話旗下一對「駿馬名駒」同「風花雪月」狀態都好弗，唔係陪跑，並有機會包Q。大摩指出「駿馬名駒」季內兩戰對手極強下亦所負不遠，好彩上場賽後減了1分，剛好合資格跑今場85至110評分區域的賽事，由於目前狀態好弗，加上今仗對手遠不如上次的「軍事出擊」、「大運財」，故機會樂觀。
至於「風花雪月」，大摩承認對呢匹馬上場1400米慶典盃只跑第六名有點失望，但經過多番檢討，發現隻馬有啲唔集中，因此對症下藥，今仗加了交叉鼻箍，認為有力回復水準。