【賀賴慰玲B仔1歲】契媽Anjay唔見肚 陳凱琳鄭嘉穎要分開影相？

蘋果日報 2018/12/03 22:49

賴慰玲黃頌祈楊潮凱陳凱琳孫慧雪鄭嘉穎陳嘉寶梁子峰梁進也
    賴慰玲舊年奉子成婚，並喺同年12月一索得男，為舞台劇演員老公梁子峰誕下麟兒進也（Marat），眨吓眼，Marat就嚟一歲大。小朋友首個生日會通常都備受重視，所以賴慰玲都喺連鎖快餐店為囝囝舉行生日會，今日佢貼相出Instagram，見到佢請咗囝囝契媽陳嘉寶（Anjaylia）及老公黃頌祈（Epaphras）、剛剛宣佈有咗嘅陳凱琳（Grace）及鄭嘉穎（新聞連結： https://bit.ly/2AgO5pN ），同場仲有已「升呢」做父母嘅楊潮凱及孫慧雪等，佢哋嘅小朋友都有嚟參加生日會。
    Grace除咗到場賀契仔之外，仲親手整咗個生日蛋糕俾契仔，獲賴慰玲大讚「別出心裁」。雖然Grace老公鄭嘉穎都有到，但喺賴慰玲貼出嚟嘅相中，見到Grace同鄭嘉穎張相係分開影嘅，而喺Grace嘅IG中，亦冇老公蹤迹﹐似乎刻意分開。
    而Anjay喺今年9月宣佈陀B半年（新聞連結： https://bit.ly/2KOQZXt ），數番手指……佢都應該陀到8、9個月，但見佢好似冇乜肥到，加上佢影相時側身企，咁啱個蛋糕又遮住咗，睇唔到佢個肚有幾大。就咁睇Anjay個樣，好難估到佢已經就快生得。不過Anjay同老公喺今次嘅生日會度好落力，賴慰玲喺個IG post度特別鳴謝Anjay，仲話Anjay同老公早到遲走都冇所謂，又好錫Marat。
    至於賴慰玲其他好姊妹如陳瀅、蔡思貝同吳嘉熙（Cheronna），就因為工作關係冇到場，不過賴慰玲都唔介意，仲話「嚟唔到都令我覺得好有愛」。
    開親呢啲生日會，都係啲小朋友交流大會，楊潮凱個8個月大囡囡楊希恩，及孫慧雪個一歲大囝囝Riley都有現身同壽星仔玩，賴慰玲希望呢班「星二代」會好似爹哋媽咪一樣，一同成長，做個好朋友喎！
    雖然仲有幾日至係Marat嘅正日生日，但都預祝咗佢生日快樂，快高長大先！
    精選娛聞，喺晒《娛果》
    http://fb.com/appledailyent
    empty
    賴慰玲喺IG貼相，公開囝囝生日會情況。（Instagram圖片）
    empty
    契媽之一嘅Grace陀住B都有出席，但就冇俾大家見到佢同老公張合照。（Instagram圖片）
    empty
    其實點解鄭嘉穎要分開影相呢？（Instagram圖片）
    empty
    Grace陀住B，都係烏低身就契仔。（Instagram圖片）
    empty
    呢個蛋糕係Grace整嘅（Instagram圖片）
    empty
    另一契媽Anjay一早到場幫手（Instagram圖片）
    empty
    Anjay老公黃頌祈都有嚟（Instagram圖片）
    empty
    交換B嚟抱喺呢啲活動上，好大機會係指定動作之一，孫慧雪同賴慰玲亦有做。（Instagram圖片）
    empty
    楊潮凱帶埋囡囡嚟參加生日會（Instagram圖片）