雷神即是雷神！嗰頭講佢上半場起孖領先騎師王，呢頭下半場一開，雷神即以蘇偉賢馬房「承你所願」勝出第六場四班草地1400米，雷神累積中三元，幾乎贏硬今日（25日）騎師王咁滯，至於「承你所願」第二次贏馬，單Win及組合獨贏A2分別派44.5及27元。

雷神跑完前六場，騎過六駒取得三冠一亞，僅頭場「幸運坊」及第三場「巴基之星」唔入三甲，在騎師王冇分。

講番「承你所願」，前仗初出即贏田草1200米，再出增程至1400米得梗頸四，今次復戰1200米順利重開勝門，三歲馬前途可謂一片光明。

第六場二至四名分別為「自動波」、「常豐裕」及「正本雄心」，四重彩派二萬四千幾，三T正獎有人中，每注派91萬幾。

沈集成馬房「自動波」由新晉馬主、出身賽馬攝影記者的蔡茂騰持有，今場後上跑第二，騎師梁家俊賽後以直路初曾受「承你所願」干擾為由，抗議其頭馬資格。最終抗議無效，「自動波」維持屈居亞軍，仍未打開服役勝門。