【百老匯電椅中心】溝埋《水行俠》、《大黃蜂》做瀨尿牛丸啦笨！
蘋果日報 2018/12/28 00:03
百老匯電椅中心水行俠蜘蛛俠：跳入蜘蛛宇宙大黃蜂
「沒有Marvel的聖誕」
今個聖誕檔期MCU電影暫時休戰，毒L戲迷如我要搵嘢充飢，Marvel以外嘅公司亦嗱嗱臨推晒啲筍嘢出嚟。
今個聖誕檔期MCU電影暫時休戰，毒L戲迷如我要搵嘢充飢，Marvel以外嘅公司亦嗱嗱臨推晒啲筍嘢出嚟。
同期科幻動漫市場由《蜘蛛俠：跳入蜘蛛宇宙》、《大黃蜂》、《水行俠》三部改篇搶食：唔知係咪香港人先入為主，以為超級英雄動畫版例必係兒嬉貨色，坊間反應冷淡，哪怕入場睇過嘅都讚不絕口，票房始終麻麻；《大》片今個星期四先正式上映，筆者又未睇到優先場數字，估唔到表現，不過啲電影網嘅網民評分就同《水行俠》差一大截；至於《水》片，香港上映四日票房已經過二千萬，而且只係截至平安夜數字，相信會成為聖誕新年最大贏家。
之不過票房贏又係唔係「高階毒L」杯茶？
「水底《Star Wars》奇觀」
老實講，本人對DC戲係零期望。「DC宇宙」一向問題出喺華納高層班計數佬身上：唔熟美漫，又鍾意話事，貪心學Marvel搵大錢，又唔畀時間煲……結果《正義聯盟》咪仆到損手爛腳囉。覺得我一介鍵盤戰士喺度廢噏？ Fine，咁聽吓商業雜誌《Forbes》點講： https://bit.ly/2s5Z165
老實講，本人對DC戲係零期望。「DC宇宙」一向問題出喺華納高層班計數佬身上：唔熟美漫，又鍾意話事，貪心學Marvel搵大錢，又唔畀時間煲……結果《正義聯盟》咪仆到損手爛腳囉。覺得我一介鍵盤戰士喺度廢噏？ Fine，咁聽吓商業雜誌《Forbes》點講： https://bit.ly/2s5Z165
瀨過DC幾部「中二病傑作」，脷都腫埋，結果相對好評嘅《神奇女俠》鄙人都唔敢入場。如果唔係幾個信得過嘅毒L影友大讚《水行俠》，呢鋪我都一定「趴時」。And I'm glad I didn't。
《水》片優點其實兩個字講完：「奇觀」(Spectacle)。喺《星球大戰》都拍到冇嚟神氣嘅廿一世紀，華裔導演James Wan居然諗到攞個海底當太空咁拍，而且大場面嘅氣勢起碼勁過魯卡斯嗰三部垃圾前傳。淨係臨尾嗰場海底大混戰已經睇到跳起：無數水兵海軍、海底異獸左穿右插，潛艇同船不停開炮……總之前、中、後景不停有嘢發生。而且啲科幻設計多花款到睇唔晒，若論視覺元素嘅豐富程度，嗰十零分鐘唔會輸畀《阿凡達》。最癲係子彈、激光射到眼都花之際，導演再推隻哥斯拉咁大隻怪獸嚟壓場；我個籮柚就係嗰一下離開咗張櫈。
反觀近年其他超級英雄電影，通病之一係大場面始終唔夠大。《正義聯盟》嗰啲廢片就唔使講啦，即使係票房班霸《復仇者聯盟3》，去到攻打Wakanda嗰幕高潮，感覺都仲係爭啲——明明千軍萬馬鋪到見唔到地下，但衰在啲怪物款式少，太多copy and paste，令人始終覺得睇緊CG，唔夠投入。若然斷件秤，《水》片每隻3D model一定做得假過《復》片，但人哋輸贏就贏在「奇觀」兩個字：畫面入面質到幾多新奇古怪嘢就盡量質，唔怕你睇唔切，只怕有一秒半秒悶親你眼球。更何況《水》嘅「奇觀」係由頭奇到落尾，絕對唔止尾場一嘢混戰咁少。
《水行俠》成本據聞只係$1.6至$2億美金，但係《復》片就拍咗$3.6至$4億；呢啲燒鵝味嘅蔗渣唔係人人煮得出。
「大黃蜂之變形E.T.」
問題係《水行俠》雖然娛樂至極，但對有要求嘅毒L嚟講佢絕對唔算好片。好多以往DC戲嘅缺點，包括故事幼稚、人物描寫滾水淥腳，佢冚棚冷有齊；今次仲畀網民疚病佢抄襲《雷神》嘅兄弟情仇，同埋《黑豹》嘅皇位爭奪戰，都幾樣衰㗎。
問題係《水行俠》雖然娛樂至極，但對有要求嘅毒L嚟講佢絕對唔算好片。好多以往DC戲嘅缺點，包括故事幼稚、人物描寫滾水淥腳，佢冚棚冷有齊；今次仲畀網民疚病佢抄襲《雷神》嘅兄弟情仇，同埋《黑豹》嘅皇位爭奪戰，都幾樣衰㗎。
明知荷里活戲要遷就大眾市場，我哋呢啲成年毒L亦唔係要吹毛求疵——冇人叫你將動漫改篇拍到《教父》咁堅，只要畀番史匹堡嗰啲扎實故仔大家已經劏雞還神。諷刺嘅係，同期被《水》片搶晒風頭嘅《大黃蜂》正正拍出一陣Spielberg味。
《大》片大橋其實又係幾個字講完：「變形E.T.」。身為博派偵察兵嘅大黃蜂就好似史匹堡經典《E.T.》一樣，糊里糊塗流落地球；因為撼親個頭，大黃蜂智商跌到精乖狗仔水平，好彩得地球少女Charlie (Hailee Steinfeld) 收留；於是少女一方面瞞住屋企人，一方面同呢隻巨型寵物發展出珍貴友誼。
好老土？本格派史匹堡係咁上下啦，但work吖嘛。之所以行得通，因為導演編劇深明上一手Michael Bay嘅弊病：單靠靚女、爆破同快到睇都睇唔到嘅打鬥，係唔能夠稱為一部「戲」。《大》片可貴之處，大約用咗三份一時間寫人物，令觀眾愛上角色。
比起前作性感偶像Megan Fox，新呢集女主角Steinfeld頂多算有氣質囡囡，毒L見到覺得有feel嗰隻。之不過「feel」正正係全片殺食之處：導演Travis Knight刻意帶大家返番去80年代，一個物質豐盛，美國流行文化百花齊放嘅年代。由Steinfeld一身rock fans打扮，到女主角貼滿搖滾海報嘅睡房，再到片中不斷出現嘅80年代流行商品，以至簡單一個老臨嘅打扮，統統懷番三、四十年前嘅舊；好多老毒L一聽到配樂用嘅「The Smiths」同「Tears for Fears」，已經想衝出戲院買soundtrack。
導演致敬嘅仲有鏡頭運用。比起Michael挑戰觀眾動態視力嘅攝影，Knight似乎係史匹堡信徒：不論文戲抑或動作場面，分鏡都不慍不火有自信，再刺激嘅畫面你都睇得清清楚楚，而且焦點由始至終都係戲劇本身。於是完成品雖不至於驚為天人，但肯定比歷嚟咁多集「老變」都窩心。
假如有人將《水行俠》嘅「奇觀」溝埋《大黃蜂》嘅「窩心」，搓出嚟嗰粒瀨尿牛丸我應該食得開心。其實搓就一早有人搓咗出嚟——粒丸個名叫《蜘蛛俠：跳入蜘蛛宇宙》。問題係識食嘅又有幾多人？
撰文：阿雞 《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組百老匯電椅中心:放棄治療部》（broadwayelectricchair）