劉心悠喺《宮心計2深宮計》飾演為尋家姐而做宮女嘅元玥，就算佢遭人欺負依然真心對人，觀眾like爆，唔少網民都話元玥同佘詩曼喺《宮心計》飾演嘅劉三好似。日前心悠接受訪問時話：「唔係完全相同，自己設定元玥係比較儍更更，佢講嘢比較粗魯，係入咗宮之後，先被迫學宮中文化。」

心悠仲話：「之前好多人同我講話喺無綫拍劇好辛苦，試咗之後發覺最難係體力，唔夠體力會連把聲都冇力，你會喺戲裏面聽到我把聲係好弱。」其實心悠體力唔差，連續十年都有參加十公里賽，最近仲搵陳志健（Otto）學打拳：「做演員要有多啲準備，好似之前拍戲有耍劍，邊個咁得閒去學？我覺得要學吓唔同嘅運動傍身，雖然我好驚水，不過我下一步諗住學游水。」但佢最大嘅心魔仍然係講廣東話：「拍完《阿嫂》之後，好多人話唔知我講緊乜嘢。今次啲對白好難handle，我驚啲人會話『吓！佢講乜嘢呀？』原來好多人明白我講嘢，仲唔使睇字幕，真係要畀啲credit自己。」
化妝：Rainbow Chung of Annie G.Chan Make-up Centre
髮型：Eric Chow of Xenter
場地提供：A+Pro Sports and Arts Training Centre
撰文：馮仁昭