【19:30】港鐵發言人回應

繼內地大叔揸電動車馳騁吐露港後，再有疑似內地大媽帶電動車搭港鐵。讀者王女士，5月10號晚10點幾，乘搭港鐵觀塘線往調景嶺方向，去到黃大仙站，見到一位疑似大媽，竟然大搖大擺揸住電動車進入車廂，「好似揸電單車咁！」由於大媽做法太招搖，引起港鐵職員注意，亦都跟埋入車廂，並要求大媽離開，但對方拒絕。

「佢話返屋企，去觀塘，唔肯落車。」雙方爭持不下，說時遲，那時快，大媽已經「咚」一聲跪咗喺地下，仲開始磕頭，由王女士提供嘅短片所見，大媽不停以帶住超重鄉音嘅廣東話求情：「畀啲人情啦！唔該！求你啦！」「我要返屋企！」「我哋係農民工嚟架！」突然有人向自己又跪又拜，港鐵職員有啲措手不及，立即安慰大媽「小姐，你冷靜少少先！」，但係大媽完全唔聽人講，愈來愈激動，「我要返屋企！」「我哋係農民工嚟架！」「我唔識字架！我冇讀書架！」「生命好短架！死咗就冇喇！」「皇帝啊！」雖然出盡渾身解數，但職員都不為所動。

眼看勸唔掂大媽，職員只好不停以對講機，同月台嘅同事聯絡，根據職員與同事嘅對話，佢會陪同大媽喺九龍灣站落車，估計短片拍攝時，列車啱啱過咗彩虹站，最終二人於牛頭角站下車，「佢叫職員抬，人哋梗係唔肯，你話人哋整壞架車點算！」。大媽發覺磕頭冇用，終於企番起身。

王女士話，大媽足足磕咗30個響頭，當時車入面乘客都幾多，大媽嘅行徑令人為之側目，紛紛拍片影相，「我覺得好誇張囉！」王女士形容女事主外貌娟好，「佢擺明唔想搭的士，為咗慳幾十蚊跪喺度，係咪有病？畀人罰錢咪罰囉！」

港鐵發言人表示，根據紀錄，彩虹站職員在5月10日晚上10時40分接獲乘客報告，指在觀塘綫一列列車上有一名女乘客帶同一輛電動單車上車，並坐在該電動單車上。港鐵立即安排職員跟進，並通知車務控制中心，職員其後在一列開往調景嶺站的列車上發現該名女乘客，於是提醒她不可以帶電動單車進入港鐵範圍。最後職員陪同該女乘客在牛頭角站下車及離開車站。

你敢爆，我敢獎！ 即Call《蘋果》24小時爆相爆片熱線 ：63836568