【新增婚禮照片】
韓劇《家和萬事成》36歲女星金素妍，去年拍劇撻着同劇37歲男星李尚禹，兩人於香港時間今日下午6時舉行婚禮，不過婚禮將以非公開方式舉行，僅邀請家人及朋友參加。

早前一對準新人已經飛到維也納拍攝婚紗寫真，而雙方嘅事務所就話今日婚禮會由導演鄭乙英為證婚人，Cultwo嘅鄭燦宇擔任婚禮主持人，至於今年3月做人妻嘅女團S.E.S.成員Bada就會喺婚禮上負責獻唱歌曲。

由於兩人行事低調，加上考慮到雙方嘅家長及賓客，所以會低調完成婚禮，亦唔會有見傳媒嘅環節，就連係唔係即刻去度蜜月都三緘其口，認真低調。雖然婚禮係非公開形式，不過金素妍嘅事務所今日下午亦公開婚禮現場照，一對新人甜蜜對望，李尚禹更一直握實老婆嘅手，場面溫馨。