日系裝修第3回話你知真正空中花園幾錢整得到？《瀛屋‧型屋》教你砌室內庭園！丨果燃上架
蘋果日報 2020/12/24 00:00
果燃台編輯推介瀛屋‧型屋
上兩回《瀛屋‧型屋》反應算幾好，有日行出彌敦道竟然聽到有對情侶提起呢個節目，真係受寵若驚！話時話裝修idea就好似一份CV咁，都係靠累積返嚟嘅，越儲得多經驗值，份嘢就越見得人，諗頭亦自然越來越多，所以參考人哋嘅裝修方法，都一樣永遠唔會嫌多！
既然睇極都唔怕多，呢個星期新上架4集《瀛屋‧型屋》，再搵嚟4個日本奇異裝修盤畀大家睇吓。率先登場係四國香川縣千馬夫婦嘅「高松市空中花園夢幻屋」。
四國嘅香川縣有烏冬之鄉嘅美譽，住高松市嘅千馬夫婦好希望屋企有個大花園，於是佢哋喺公園隔籬買咗塊地起樓，間屋設計又窄又長，睇落似舖頭。
話說千馬夫婦好希望屋企有個大花園同庭園，雖然比起香港日本嘅房產地價已經好好多，起碼炒風冇咁離譜。但大家都明啦，往往因為「畢直」所限，要有個花園又邊有咁易吖。直到有一次千馬太太靈機一觸，諗起個屋頂就咁擺咗喺度好浪費喎，何不將佢變成一個小花園？於是兩公婆夾手夾腳執到佢靚一靚，真係將個屋頂變咗做一個空中花園𠻹！而且佢哋仲為屋企設置一個大窗，將屋企對出嘅公共公園化身成為猶如私家花園一樣，街坊街里路過會過嚟打招呼，或者小朋友喺公園追趕跑跳碰玩到嘻嘻哈哈，一切都如像自家花園嘅風景一樣，盡入眼簾！將一間明明只有462呎嘅小屋，變成擁有兩個花園嘅夢幻屋，千馬夫婦認真好諗頭！
屋企對出就係公共公園，簡直就如私家花園，街坊街里路過都會過嚟打聲招呼。
明明烈日當空，點解會落起雨嚟嘅呢，原來係千馬先生喺度搞氣氛自製浪漫效果。
離開高松市我哋往東走，去到大阪八尾市，探訪稻本先生一家四口。頭先千馬夫婦就將間屋「往外發展」吖，稻本先生就啱啱相反，間屋係「往內發展」喎，形成咗呢間「大阪八尾室內庭園屋」！
大阪八尾市有間白色嘅屋，外牆係圓角設計外貌非常可愛。
稻本先生因為想家人更有生活空間，尤其係畀小朋友玩嘅地方，於是喺屋企設置不少機關，譬如將屋企中庭嘅樓底打通，閂晒門就變做室內空間，打開門又變返好似室外空間咁，但你話佢室外咩？實際上你又係喺室內喎。媽，好亂呀，同太陽能電筒，或者表面上係對鞋而實際上係鬚刨嘅凌凌漆武器有得揮呀！唔單止咁，稻本先生仲設計咗一個明明係櫃，但實際上又係一條樓梯嘅暗道，用嚟直上閣樓儲物室。我開始懷疑，稻本先生係咪特務嚟㗎?
屋入面仲種咗樹，空間非常寬闊，身在家中就如置身庭園之中。
稻本先生巧妙設計出一個室內及室外元素兼備嘅室内庭園，仲可以喺客廳放個泳池仔畀小朋友玩水添。
離開大阪我哋再往東行，嚟到東京白金町，今次嘅改裝家居可能比較踏實啲、實用啲，事關團野先生一家三口，竟然買咗幢三層高嘅工廠大廈，搞咗一幢「白金町工廠吊床翻身屋」出嚟！
呢度係東京港區白金，白金係一個著名嘅高尚住宅區，不過下町區呢類望落毫不起眼嘅舊工廠大廈其實唔貴。
屋裏面唔單止光猛，裝修亦都好時髦，最正嘅係團野先生玩咗一張凌空吊床，又係將室內同室外感mix and match嘅玩法！雖然大廈有成34年樓齡，但作為工廠用途嘅大廈，原先嘅結構非常之堅固，所以團野先生大膽將其中一面牆拆走，改為開揚嘅大窗戶為全間屋採光，真係醒目！
團野先生喺白金嘅下町地區買入呢幢三層高嘅舊工廠大廈，將佢改裝成住宅，活動空間非常足夠，阿仔喺屋企打籃球都得。
而本身嗰張吊床亦都攞晒獎吖，唔止睇得，直情一家三口一齊瞓落去都頂得住呀！其實工廠大廈潛藏住無盡可能性，不過喺香港就可能無咁自由，唔係你想點玩就點玩。如果想參考呢種裝修大法，記住查下法例先好做呀！
將地下同2樓打通中間整咗張吊床，不單能夠採光仲可以作為一家人嘅活動空間，實在係個非常聰明又獨特嘅設計。
最最後我哋再往北走，去到宮城縣岩沼市，睇吓呢間最後大佬之屋「宮城縣三代同堂Chill居」呀！叫得做「最後大佬」就梗係唔簡單啦，因為呢間屋嘅屋主夫婦，係要同埋「奶奶」一齊住㗎！話說洞口先生嘅爸爸早逝，於是留返間屋畀洞口先生同媽媽。之後洞口先生又結婚生仔喎，咁就惟有將老房子翻新大改造三代同堂一齊住。
宮城縣岩沼市呢間屋由60年樓齡嘅舊民居改裝，望落去相當有型。
洞口先生一家3口同「洞口奶奶」一齊住，三代同堂相處點解咁融洽，皆因洞口太太係一位一級建築師，間屋設計由佢一手包辦，令「洞口奶奶」對呢位新抱非常滿意。
「洞口奶奶」本身都係一個人氣美容師，外表內裏都比較新潮，襯埋間型屋，幾有無印feel。
講到同奶奶住呢家嘢呢，香港同日本就直情無文化差異嘅，甚至乎可能日本仲惡劣啲㖭！不過洞口家族都算好彩喇，一來「洞口奶奶」係一個幾yo吓嘅人氣美容師，外表內裏都比較新潮，絕唔係粵語殘片嗰啲奶奶，二來洞口太太係一位一級建築士（點解呢個節目咁多建築師嘅呢？），要將呢間有成60年樓齡嘅屋翻新，兼夾令三代同堂而又各有空間咁生活，絕對難唔到洞口太太。而喺改建嘅過程中，洞口奶奶提出要使用高第嘅建築風格（19世紀設計西班牙聖家教堂之建築師），而偏偏日本呢種高樓齡嘅屋，又唔啱呢種風格。唉，無計啦，奶奶話要，唔通新抱唔整咩！不過都托賴啦，最後洞口太太都成功阻止咗一場婆媳大戰嘅！
老房子可塑性非常高，木建築本身亦係文化遺產，加上你睇吓個樓底，真係高到你唔信㗎！
一連三個星期共13集嘅《瀛屋‧型屋》，去到呢度暫告一段落，全線13集亦已於《果燃台》全部上架，歡迎隨時翻睇攞靈感！其實無論喺世界各地邊個地方都好，「住屋」都係人類排頭位最重視嘅生活必須品之一，所以「睇屋睇裝修」亦係不分膚色種族咁受歡迎。無論係快樂嘅年代，定係艱難嘅日子，每個人都想為自己嘅屋企做到最好，希望大家繼續維持呢份心，好愛好愛咁愛自己嘅家！
果燃台 | 果迷專屬嘅影片世界
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！