勞工界議員李鳳英前日唔小心跌倒，要入院做手術移番正盆骨，仍要留醫休養，據知英姐現時情況ok，八方祝佢早日康復。好多議員都關心英姐傷勢，但為免打擾佢休息，所以冇去探病，噚日紛紛寫慰問卡，亦有議員送花籃畀佢。
意外後主席曾鈺成話要改善設施，避免再生事故，但由於立法會大樓屬法定古蹟，任何改裝、加建都要向古物事務監督申請，獲批准先可以動工，未必可以喺短期內成事。建築界議員劉秀成話，由於大樓係古蹟，所以樓梯、扶手都未必符合最新建築物條例標準，走火通道、防煙門亦可能唔啱規格，英姐跌倒條樓梯，就係因為又窄又斜而出事。

建議加垂直扶手

劉秀成話支持盡快加裝扶手，佢建議可以考慮加設垂直扶手，好多有大量長者使用嘅場所都有類似設施，萬一失去平衡跌倒，都有嘢掹住唔使跌親。佢笑言唔少議員都一把年紀，呢種設施有實際需要。劉秀成又指安裝新扶手唔係大工程，相信古物事務監督會批准，只要度好尺寸同有詳細圖則，一、兩個工作天就整好。