【師奶炒車位】9個月短炒40個深井車位賺137萬 「我賺少少就賣」
豪景花園車位師奶炒車位
【新增影片】
曾驚現史上最平月租300元車位的深井豪景花園,近期被一名神秘炒家炒作,明查暗訪,這名炒家只是一位名不經傳的天水圍師奶。過去9個月,先後買入豪景花園40個車位,短炒1至3個月,賺幾萬蚊即離場,密食真是當三番,暫沽出19個車位,賬面已賺137萬元。
她接受本報電話訪問表示:「我賺少少就賣㗎啦,又唔會好貪心。如果要賺夠十萬八萬先賣,咁咪有排等囉,係咪先!」
深井豪景花園停車場車位近期轉趨活躍,一個月有成20多宗成交,交投比十大屋苑更旺。無他嘅,銀碼細,五、六十萬,銀行借4成,首期都只是24萬元。不過屋苑位處青龍頭,無地鐵,要駁小巴出入荃灣或葵芳,或屋苑穿梭巴士去荃灣。其中一宗最新成交,為A場地下126號及140號車位,分別以54.2萬元及56萬元成交,兩個車位原業主為同一人,姓張,今年3月以共100萬元向發展商華懋買入2個車位,持貨2個月就沽出,賬面賺10.2萬元。
土地註冊處資料,這名業主姓張,報稱住天水圍柏慧豪園,細查之下,原來他自去年9月起開始密密吸納深井豪景花園車位,第一炮買入停車場地下19號及地下116號車位,分別作價30.2萬元及32.5萬元,以車位可借4成按揭計,這段密食當三番之路,投資起步成本只是37.62萬元。兩個車位,完成交易後,一個月內即沽,分別以34.5萬元及36.5萬元甩手,扣除稅款共約1萬元,仍賺約7萬元。
賺開有條路,去年9月至今年5月,9個月內,先後買入共40個車位,買入價由30.2萬元至50萬元,除了向二手業主掃貨,部份車位向發展商華懋一手購入。目前已沽出19個車位,作價36.5萬元至56萬元,賺價由4萬元至11.5萬元,暫時賺約137萬元,尚有21個車位揸手。
她接受本報電話訪問,劈頭就話「唔好叫師奶啦!」,比較鍾意人叫佢湯太。她稱:「以前都會投資住宅,但有時遇到惡租霸,整爛哂你間屋,還返間屋俾你個陣又唔交租,又要告佢,又要收屋,都幾麻煩。車位投資好好囉,佢又唔使裝修,又唔使打理,又唔驚啲人唔交租,佢唔交租,打俾管理處就得。」
她話當初係互聯網見到深井豪景花園車位是全港最平室內停車場,「上水露天車位都賣到六、七十萬,豪景花園車位回報又唔錯,租到千幾蚊一個月,回報起碼3至4厘,都唔錯…計返仲好過買樓,升值能力都好高……」
事實上,豪景花園車位已升逾50萬元以上,目前她持有21個車位絕大部份作價50萬元以下,難怪講得興起,「so far來講,多數都賺,好少蝕!」雞仔注,換來不是無肉食,對於湯太來講是另一種的保險,「你買樓百幾二百萬,升就好囉,渣一聲…跌,咪大件事,呢啲進可攻,退可守,又唔使擺好多錢嘛,又容易甩手。」
她坦言真是好似打麻雀密食當三番的心態, 「我賺少少就賣㗎啦,又唔會好貪心。如果要賺夠十萬八萬先賣,咁咪有排等囉!係咪先。你啱價錢,咪入貨,有時合理價咪賣囉!我唔會咁貪心。(何謂合理?)價錢適中,可能而家啲人買55萬,咁有52、53萬,咁買到咪買囉!」
育有一仔將近出身,講到話家陣炒車位賺到,係咪可以退休,她笑住答:「哈哈!我哋都係玩下㗎咋,唔使做㗎啦,全職買下車位,啱價咪賣囉,都搵到兩餐架,ok㗎!」
事實上,她目前持有21個車位,每個月收租1500元推算,每月單是收租已收3.15萬元。
掌握財經生活資訊,即Like「蘋果ATM」fb專頁啦!
http://fb.com/appledailyatm
天水圍湯太過去9個月掃入深井豪景花園40個車位,暫沽19個,賬面賺137萬元。餘下21個車位,單是收租,料每月袋逾3萬元。
湯太今年3月以50萬元向華懋買入圖中這個1期地下雙號車,持貨2個月以54.2萬元沽出,賬面賺4.2萬元。