女子組合Super Girls噚晚喺銅鑼灣出席「Fashion Walk Medusa萬聖節慶祝派對」，佢哋5個女仔都好鍾意喺萬聖節扮鬼扮馬出去玩，Jessica就話扮過肥豹、Cheronna就扮過中國娃娃、Yanny就試過自己化恐怖鬼妝、Heidi扮過小丑女、Aka就話今年想玩吓新意，扮wonder woman，但佢就畀其他隊員笑佢話：「不如妳扮北海道長腳蟹啦！」Aka笑言唔介意，但講起最近，佢就話因為打功夫，意外扭傷膝頭，不過就仲未睇醫生。

問到Cheronna萬聖節會唔會同男友黃奕晨去鬼屋玩？佢就大爆男友細膽話：「佢好驚鬼，我入到去會保護佢，不過應該冇時間去。」但係Cheronna出名鍾意睇鬼片，咁點算呢？Cheronna就話：「佢好辛苦㗎，要迫佢睇，不過必要時佢會保護我嘅。」

另外，Heidi之前發現有情緒病，佢就放咗假去日本散心，o依家已經好返好多。