韓國綜藝節目《Running Man》(RM)將於聽日播出最新一集，節目組率先公開預告相，當中擔任特別嘉賓嘅前女團SISTAR成員昭宥，喺節目上為《RM》成員準備普拉提按摩，難得嘅待遇令一眾男性成員爭崩頭，紛紛想得到昭宥嘅按摩，李光洙更直接趴喺地下向昭宥示愛，引起爆笑。不過當昭宥為光洙進行普拉提按摩時，光洙就因為太痛而露出痛苦嘅表情，HaHa及宋智孝一度以為光洙扮痛，要求嘗試普拉提按摩，結果無一倖免。

另外，於節目錄製途中各人要履行任務，光洙及新成員楊世燦不斷失誤，令金鐘國大感失望，不過金鐘國對待兩人嘅反應就大不同。對於光洙，金鐘國會不停嘮叨及責罵，但佢就會暖心安慰楊世燦，明顯嘅差別對待令光洙呷醋。而之後嘅任務中，光洙就不斷妨礙楊世燦，令對方嘅任務失敗，除此之外，光洙更坐喺金鐘國大髀上，錫金鐘國塊臉向對方撒嬌，令一眾成員極為震驚。