【新增內容】

話晒都係中國國家主席習近平嚟港，慶祝香港回歸廿年，梗係要做個大騷賀一賀佢啦。

無錯，呢個節目就係《慶祝回歸祖國 二十周年文藝晚會》，晚會歷時大約個半鐘，容祖兒、甄子丹、李克勤、古巨基、莫文蔚、黎明、林子祥夫婦等等都係表演嘉賓，但講到主角，一定係習近平嘅。

晚會臨到尾聲，所有表演單位，都企晒喺台上面拍手，而主持就邀請咗習近平同夫人彭麗媛，仲有梁振英上台，同前排嘅表演者逐個握手，到最後就一齊唱《歌唱祖國》，真係，好感動。

當大家以為習近平一定係壓軸嘅時候，錯晒，因為有一位着橙色旗袍嘅中年女士佔據咗電視畫面！呢位女士笑晒口，攤大兩隻手掌，成功得到兩秒air time！佢仲係成個節目最後一位得到近鏡嘅人物！據知展示歡樂笑臉嘅「大媽」，係臨時演員，點知有工作人員犯咗「低級錯誤」㩒錯掣，以致畫面上「大媽」出現三次。無綫回應傳媒查詢時，就表示該張相片先前已在黎明演出《獅子山下這是我家》項目中背景大螢幕經電腦編排播出100張開心笑臉照片的其中一張，其後在節目結尾時因電腦故障再度彈出。

據知個鏡頭㩒出街一定係要經人手控制㩒掣，令人質疑出錯真正原因。今次個回歸騷余詠珊搵左自己愛將Jacky Lee李志倫做主力監製，但Jacky 今年初重做緊「勁歌」頒獎典禮導演，即係網上爆seed鬧「勁歌」監製麥鎮東嗰個，之前拍好多MV,被封MV界余文樂，同好多藝人傳過緋聞，Jacky完全冇做大騷監製經驗。有指余詠珊有私心，雖然TVB好多有做大騷經驗嘅舊人監製，按無綫以前監製做呢類大騷，起碼要有超過10年經驗先有得做，但余詠珊就㨂咗要呢個自己人嘅新人孭重飛，要捧自己人，結果搞出大頭佛。

不過事件無耐再傳出另一說法，有指Jacky的團隊留守電視城，大台另一綜藝節目監制衛世輝團隊就喺會展，至於邊方面出錯，就解釋唔到。而Jacky喺facebook同朋友講，就話係「有人太緊張撳錯掣」。

之後鏡頭極速影番全場大合照，隱約見到習近平向台下觀眾揮手，但就再冇佢嘅近鏡出現。如果呢位神秒女士就係大台喺回歸廿年送俾習近平嘅禮物，真係幾驚喜喎。

另外，由於晚會保安好嚴，全部明星嘅保母車都唔可以駛入，大家要集體坐車走，幾位表演嘉賓就趁機一齊喺車上合照。